LETRAS GALEGAS 2021: XELA ARIAS

Xela Arias Castaño (Sarria 1962 – Vigo 2003) foi a personalidade literaria elexida pola Real Academia Galega RAG para protagonizar o Día Das Letras Galegas 2021. Con este nomeamento a RAG reivindica a memoria, a cultura e a lingua do pobo galego. Xela foi escritora, tradutora e profesora galega. Poeta rompedora e muller comprometida co movemento feminista, ecoloxista e pacifista.

Para coñecer a figura e a obra de Xela preparamos o seguinte documento (ALFIN):

LETRAS GALEGAS 2021: XELA ARIAS 

Cunha pequena exposición de libros sobre a súa vida e a súa obra rendimos homenaxe a XELA ARIAS e tamén á figura das mulleres ás que lles adicaron as LETRAS GALEGAS en anos anteriores: Rosalía de Castro, Francisca Herrera, María Mariño e María Victoria Moreno.  

ACCIÓNS POLA IGUALDADE

Na semana do 10 ao 13 de maio realizamos unha serie de actividades, en colaboración coa ANPA do noso centro, para a promoción da igualdade e a prevención da violencia de xénero. 

Realizáronse dous tipos de actividades:

1- Sesións de contacontos e xogos para infantil, 1º, 2º e 3º de primaria.

2- Obradoiros de ciencia a través dos traballos e inventos de mulleres científicas, para o alumnado de 4º, 5º e 6º de primaria.

Na seguinte presentación tedes máis información e imaxes das distintas actividades:

DÍA DO LIBRO 2021: APADRIÑAMENTO VIRTUAL

Todos os anos ao chegar estas datas facíamos unha das nosas actividades preferidas: O APADRIÑAMENTO LECTOR. O curso pasado xa foi diferente e foron as familias as que fixeron de padriños e madriñas para lerlle aos nenos e nenas nas súas casas.  

Este ano, tamén tivemos que realizalo de forma diferente ao non poder xuntarnos e ter que manter as aulas "burbulla": fixemos un apadriñamento virtual. 

Os alumnos e alumnas de 4º, 5º e 6º de primaria foron os padriños e madriñas que lles leron aos máis pequenos do cole diferentes contos que previamente gravaron nun vídeo e que logo foron proxectados nas diferentes aulas.

A experiencia resultou moi positiva, pero esperamos o vindeiro curso facelo ao xeito "antigo" para que a actividade resulte máis entrañable e os afillados e as afilladas  gocen sentindo a cercanía do seu padriño ou da súa madriña e viceversa.

Aquí tedes os contos que se gravaron e proxectaron. Dos deles fan referencia ao CAMIÑO DE SANTIAGO, dado que este é o tema do noso proxecto anual. 

- BO CAMIÑO, VALENTIÑO! 

- CANTO TE QUERO, PROFE!

- MAROSA E MARIÑA CAMIÑAN A COMPOSTELA 

- A VACA QUE PUXO UN OVO 

MULLERES LIBRES POR UN MUNDO IGUALITARIO

Dende a escola buscamos sempre inculcar aos nosos alumn@s  o respecto, a tolerancia e o compromiso fronte ás diferenzas das persoas, independentemente da súa orixe, das súas crenzas e do seu sexo, e formalos na convinción de que todos somos iguais fronte á lei, todos temos os mesmos deberes e dereitos, e todos podemos ser recoñecidos e valorados en igual medida, independentemente do sexo co que nazamos, no desempeño dos nosos postos de traballo e polas nosas capacidades. 

Por iso queremos colaborar xa dende a etapa de infantil, dándolles a coñecer grandes mulleres que foron pioneiras en distintas facetas, ata non hai moito, case exclusivas  dos homes (grandes empresarias, políticas, gobernantas, científicas, deportistas, enxenieiras...) Co nosa pequena aportación dende a escola, queremos acabar cos estereotipos e as discriminacións, aínda tan presentes na actualidade.

Neste trimestre, os nenos e nenas de 6º de infantil realizaron un proxecto sobre unha pioneira: SONIA DELAUNAY

SESIÓN DE CONTACONTOS: EL ÚLTIMO ÁRBOL

Despois da volta das vacacións, o 6 de abril, os pequenos e pequenas de infantil tiveron unha grata sorpresa no cole: unha sesión de contacontos cunha historia centrada no medio ambiente, na súa defensa e coidado, e na importancia que ten para todos nós.

EL ÚLTIMO ÁRBOL, de María Quintana Silva, foi a historia que escoitaron os nenos e nenas de 3, 4 e 5 anos en diferentes sesións (esta vez cada grupo dentro de cadansúa aula) e na que participaron activamente, interactuando coa contacontos que lles fixo partícipes da historia. 

"As árbores decidiron marcharse. Goran ve como o bosque se vai transformando nun deserto e preguntase tamén se a árbore do seu xardín xa se marcharía. Cando chega á casa, atópaa xusto a tempo para poder convencela de que se quede...".

Na seguinte presentación tedes unha selección de fotos dos momentos vividos durante as diferentes sesións:

Podedes escoitar o conto visualizando o seguinte vídeo: 

Os pequenos e pequenas remataron a sesión bailando e cantando ao ritmo da seguinte canción que nos fala de salvar o Planeta:

CENTENARIO DA REVISTA NÓS

No ano 2020 pasaron moitas cousas extraordinarias no mundo... unha delas, que seguro pasou desapercibida, foi o centenario da primeira publicación da Revista Nós. Algo que esta intimamente relacionado con Ourense e coa Xeración Nós que tamén tivo as súas raices na nosa cidade. Concretamente o número 1 da revista foi publicado o 30 de outubro de 1920. 

A semana pasada, cada alumno e alumna de 5º de primaria elexiu un personaxe ou aspecto relacionado coa Revista para investigar: Castelao, Vicente Risco, Florentino Cuevillas, a revista, a Xeración...  foron algún dos temas escollidos.

"Unha vez recollida a información, realizamos un coloquio conxunto onde os rapaces e rapazas fomos expoñendo as nosas averiguacións e opinións. 

Para rematar de profundizar no tema, o 9 de marzo fixemos unha visita virtual á exposición que fisicamente se atopa no centro cultural Marcos Valcárcel da nosa cidade. Para iso contamos coa axuda de Tatiana Feijoo, que foi a encargada de guiarnos de maneira virtual pola exposición: "Galicia, de Nós a nós". Ela puxo a proba os nosos coñecementos con moitas preguntas. Pero tamén descubriunos: o nacemento dos xornais galegos e a súa vinculación coa revista, se había mulleres que colaboraban coa revista, de onde sacaba as ideas das portadas Castelao e mil cousas máis...

Merece a pena! Se podedes, ide a visitala!" 

Nestas fotos vedes algúns momentos da visita virtual e da charla con Tatiana:

Se queredes ter máis información sobre a Revista, a Xeración Nós e ver todos os números publicados, premede no seguinte enlace:

REVISTANOS.GALICIANA.GAL

A MULLER NO DEPORTE

Este ano centramos o traballo do DÍA INTERNACIONAL DA MULLER en destacar a figura da MULLER NO DEPORTE.

En cada aula realizouse un traballo de investigación sobre unha deportista destacada e con esa información elaborouse un cartel que logo se expuso nun gran mural conxunto. Destacáronse deportistas como: Ana Peleteiro (atleta), Lara Balseiro (xogadora de fútbol sala), Ane Santesteban (ciclista), Elsa Baquerizo (xogadora de voleibol), Gemma Mengual (nadadora de sincronizada), Garbiñe Muguruza (tenista), Marta Bobo (ximnasta rítmica), Carmen López (surfista), Laia Sanz (piloto de motos), Gisela Pulido (kitesurf), Amaya Valdemoro (xogadora de baloncesto), Mireia Belmonte (nadadora), Almudena Cid (ximnasta), Liliana Fernández (xogadora de voleibol), Lydia Valentín (halterofilia), Carolina María Marín (xogadora de bádminton)...

DÍA DA MULLER: A muller no deporte 

Ademais deste traballo de investigación realizado na semana previa, o propio 8 de marzo tivemos no colexio unha xornada moi especial na que a muller e o deporte foron protagonistas. 

Primeiro, todos os alumnos e alumnas realizaron unha videoconferencia con Lucía Méndez Lamas, xogadora de baloncesto no ISE COSTA DE ALMERÍA e logo recibimos no propio centro a visita de deportistas da nosa localidade: 

- Sara Moreno, Iria Saeta e Jenny Lores do EQUIPO DE FÚTBOL SALA ENVIALIA.

- Gladys Giráldez López e Rebeca Kruse Rua do CLUB VOLEIBOL OURENSE (categoría senior).

- Antía Rodríguez Méndez e Nadia Ramos Álvarez (antigas alumnas do centro) do CLUB VOLEIBOL OURENSE (categoría cadete).

Elas explicáronnos as súas experiencias e vivencias como mulleres no deporte:

·         Estereotipos de xénero mais comúns no deporte.

·         Igualdade / desigualdade no deporte e na súa práctica.

·         Linguaxe empregada, trato cara a muller deportista.

·         Vestiario e equipación, tipo de vestimenta…

·         Persoas referentes mulleres/homes… (fútbol, baloncesto,       voleibol…)

·         Publicidade (medios de comunicación), xornais….sección   deportes.

·         Oportunidades de traballo, salario….

·         Barreiras e dificultades atopadas para acceder ao deporte.

·         Valores e actitudes.

   Contestaron ademais a todas as preguntas que lles fixeron os nenos e as nenas, xogaron cos máis pequenos, ensináronlles técnicas propias do deporte que practicaban, asinaron autógrafos...  unha completa xornada que encantou a todos e a todas. 

No seguinte vídeo temos un resumo dos momentos vividos:

DÍA INTERNACIONAL DA MULLER: EXPOSICIÓN DE LIBROS

Para conmemorar o DÍA INTERNACIONAL DA MULLER, que se celebra cada 8 de marzo, comezamos coa exposición de libros sobre esta temática para dalos a coñecer a toda a comunidade. Biografías de mulleres científicas, escritoras, activistas, defensoras da igualdade de dereitos... e tamén libros con historias sobre mulleres valentes, loitadoras, que souberon, a pesar das dificultades, seguir o camiño que se marcaron e historias tamén divertidas co trasfondo da igualdade e o estereotipo de xéneros. 

 

Na seguinte presentación temos a selección de libros:

MAÑÁ DE RAP

Se o pasado 22 de febreiro celebrabamos o mes da poesía cunha mañá de  REGUEIFAS (forma de expresión oral propia da cultura galega). O día 25 os alumnos e alumnas de 3º e 4º de primaria tiveron contacto tamén cunha forma de expresión oral moderna: O RAP, que ten certas similitudes coa regueifa: rima, improvisación, ritmo, oralidade, denuncia, temas de actualidade... 

Se Pilar Mira instruiunos na regueifa, foi o rapeiro ALAN ÁLVAREZ ARAÚJO, "EL ALANBUR" o que nos introduciu no mundo do RAP. Estas son algunhas notas da súa presentación: 

RAP- FREESTYLE 

"Tengo 24 años y llevo en el mundo del HIP HOP  desde los 13 años, donde descubrí el rap y a su vez el freestyle... ha sido un apoyo en mi vida para expresarme y "sacar" todo lo que llevo dentro, tanto improvisando como escribiendo... compito en batallas de freestyle desde hace unos 4 años, a nivel regional, autonómico y nacional.. otra de mis pasiones es ejercer de monitor de ocio y tiempo libre y juntar las dos cosas, me parece una idea excelente: mostrar a los niños el valor de la rima, el rap y la improvisación... me parece muy interesante y divertido para ellos".

A actividade realizouse no patio do colexio, gardando as medidas establecidas no protocolo COVID. Alan explicoulles o que era o rap e o freestyle e fixo improvisacións con palabras que lle ían dicindo os nenos e as nenas: zarigüeya, otorrinolaringólogo, coronavirus, igualdad, brócoli, Charizard...

 

 

Tamén fixeron exercicios de expresión corporal, rimas, ritmo... que encantaron aos nenos e ás nenas. 

Logo os alumnos e as alumnas, entusiasmados, seguiron coas súas improvisacións na aula.