jueves, 30 de septiembre de 2021

BENVIDA CURSO 2021-2022

PROBA  1

Benvid@s!

Aquí estamos de novo coa ilusión de comezar un novo curso. Traemos unha mochila cargadiña de ganas de traballar, aprender, emocionarnos, descubrir....

E todo isto vai da man do noso amigo LIBRÍN.

Este ano o PDI (proxecto de centro) que eliximos para traballar ao longo de curso ten o título de DIVERSIFICANDO, que é a suma do proxecto do curso pasado ECOPEREGRINOS NO BO CAMIÑO e o deste ano ESCOLA VIVA (cos que participamos en VOZ NATURA)

Con este proxecto queremos dar visibilidade á diversidade das persoas como medio para enriquecernos e aprendermos uns dos outros.

Esperamos que comecedes o curso con moita ilusión e desexamos que veñades pronto a visitar a LIBRÍN!!

miércoles, 23 de junio de 2021

RECOMENDACIÓNS LECTORAS PARA O VERÁN 2021

Xa temos aquí as nosas recomendacións para gozar ao longo destas merecidas vacacións (este curso máis merecidas ca nunca) de bos momentos con lecturas para todos os gustos e as idades. 

Recordade que un libro é un bo amigo e está agardando sempre por nós, desexando contarnos a súa historia e que pasemos as súas páxinas... non deixedes de achegarvos a eles, ben sexa na casa ou ao aire libre, na praia ou na montaña, sós ou acompañados, onde vos atopedes... gozade con boas lecturas este verán!!

sábado, 12 de junio de 2021

CHARLAS SOBRE O CAMIÑO 3

O luns 10 de maio os nenos e nenas de 5 anos B contaron coa visita de Elena Fidalgo Laínez, unha profe que sabe moitas cousas sobre o Camiño de Santiago. Faloulles dos 3 camiños principais, o Francés, o do Norte e a Vía da Prata. Sobre un mapa foron pondo  fotos das  localidades máis importantes polas que pasan os distintos camiños. Preparounos varios xogos para deixar na clase: Tres en raia, De contas polo Camiño, Lince do Camiño, Todo en orde!, Localizados! e Bingo cruzado do Camiño.

 Elena agasallounos cunhas postais onde aparecen os nen@s de peregrinos nos lugares máis emblemáticos das diferentes localidades polas que pasan os tres camiños.

A partir de aquí, os pequenos e pequenas de 5 anos, seguiron investigando e realizando actividades arredor do Camiño:

MAPA DAS PRINCIPAIS RUTAS DO CAMIÑO:

ETAPAS DAS DIVERSAS RUTAS:


O LAPBOOK DO CAMIÑO:


  


OS NOSOS MAPAS E A  NOSA "COMPOSTELANA":




viernes, 11 de junio de 2021

CHARLAS SOBRE O CAMIÑO 2

Continuando coas charlas sobre O Camiño realizadas ao longo do mes de maio, tamén temos que destacar as que impartiron Carlos López Blanco e Ana Rosa Cid que viñeron a explicarlles aos rapaces e ás rapazas de 4º, 5º e 6º de primaria, que ademais das tradicionais formas de facer o Camiño (a pé, a cabalo ou en bicicleta) había  unha cuarta forma moi orixinal de realizalo: en "kayak" . 


Partindo de San Vicente do Mar, realizaron o seu percorrido en kayak a través da Ría de Arousa, facendo distintas etapas entre as illas desta ría, continuando logo polo río Ulla ata Padrón e facendo os últimos tramos do camiño xa a pé, ata chegar a Santiago de Compostela. 


Segundo a tradición, os restos do Apóstolo foron traídos a Galicia polo Mediterráneo  e entraron a Galicia pola Ría de Arousa e o río Ulla ata chegar a Iria Flavia, para ser trasladados finalmente a Santiago. 

Ademais de explicarlles a súa experiencia cos kayaks, as súas dificultades e vantaxes, tamén lles falaron do significado do Camiño, das diferentes rutas, dos símbolos... e tiveron que contestar a unha morea de preguntas que lles fixeron os nenos e nenas sobre esta forma, que a maioría non coñecía, de realizar O Camiño. 


martes, 8 de junio de 2021

ENQUISA ANUAL

Deixámosvos o enlace á unha enquisa para que valoredes o funcionamento da biblioteca ao longo deste curso 2020-2021:

lunes, 31 de mayo de 2021

PHOTOCALL DO CAMIÑO

Outra das actividades realizadas dentro do noso proxecto ECO PEREGRINOS NO BO CAMIÑO, consistiu nunha exposición na entrada do cole con fotografías dos nenos e das nenas, sós ou acompañados, nalgún punto da ruta do Camiño de Santiago, preferentemente na Vía da Prata, por ser esta ruta á que lle demos máis prioridade por pasar pola nosa cidade. 

Aínda non rematado, pois continuaremos no vindeiro curso, aquí temos xa as primeiras fotos:



martes, 25 de mayo de 2021

CHARLAS SOBRE O CAMIÑO

Para que os nenos e as nenas coñeceran de primeira man información sobre O Camiño, o seu significado, as diferentes rutas, os símbolos, as motivacións e as vivencias da xente que o leva a cabo, realizamos no centro unha serie de charlas. 

Tanto nas aulas de infantil, coma nas de primaria, en distintos días e sesións, ao longo do mes de maio,  contamos coa presenza de membros da nosa comunidade educativa que xa realizaran algunha das rutas: 

- Esther, nai de dous alumnos do centro, explicoulles as súas experiencias ao longo do Camiño, e ensinoulles mapas, cunchas, cabazas, credenciais (a compostelá) e contestou a todas as preguntas e dúbidas dos rapaces e rapazas... Esther realizou o Camiño Portugués dende Os Rosais.

























- Mila, conserxe do colexio, que realizou xa catro tramos diferentes: dende Sarria, a pé, dende Ponferrada en bicicleta, dende Avilés a pé e dende A Gudiña en bici. Tamén lles contou as súas vivencias e lles deu consellos de como debían prepararse por se algún día se animaban a realizar esta experiencia que para ela resultara moi positiva e enriquecedora.






viernes, 21 de mayo de 2021

ECO PEREGRINO NO BO CAMIÑO

Este curso traballamos sobre o proxecto centrado no Camiño de Santiago é titulado "ECO PEREGRINOS NO BO CAMIÑO". Dada a situación complicada coa que comezamos o curso, demoramos un pouco o seu comezo, pero a intención é de continuar co mesmo o vindeiro curso. 
Para ambientar a nosa biblioteca, decoramos a porta de entrada como se fose a entrada da Catedral de Santiago e fixemos unha exposición de libros sobre a temática que íamos a traballar. Mafalda, que nos acompañou todo o curso, tamén quixo vestirse de eco-peregrina:












Ademais decoramos o corredor que dá entrada a nosa biblioteca coas etapas da Ruta da Prata (por ser esa ruta a que pasa por Ourense)




jueves, 20 de mayo de 2021

LETRAS GALEGAS 2021: XELA ARIAS

Xela Arias Castaño (Sarria 1962 – Vigo 2003) foi a personalidade literaria elexida pola Real Academia Galega RAG para protagonizar o Día Das Letras Galegas 2021. Con este nomeamento a RAG reivindica a memoria, a cultura e a lingua do pobo galego. Xela foi escritora, tradutora e profesora galega. Poeta rompedora e muller comprometida co movemento feminista, ecoloxista e pacifista.

Para coñecer a figura e a obra de Xela preparamos o seguinte documento (ALFIN):


Cunha pequena exposición de libros sobre a súa vida e a súa obra rendimos homenaxe a XELA ARIAS e tamén á figura das mulleres ás que lles adicaron as LETRAS GALEGAS en anos anteriores: Rosalía de Castro, Francisca Herrera, María Mariño e María Victoria Moreno.  





martes, 18 de mayo de 2021

ACCIÓNS POLA IGUALDADE

Na semana do 10 ao 13 de maio realizamos unha serie de actividades, en colaboración coa ANPA do noso centro, para a promoción da igualdade e a prevención da violencia de xénero. 

Realizáronse dous tipos de actividades:

1- Sesións de contacontos e xogos para infantil, 1º, 2º e 3º de primaria.

2- Obradoiros de ciencia a través dos traballos e inventos de mulleres científicas, para o alumnado de 4º, 5º e 6º de primaria.

Na seguinte presentación tedes máis información e imaxes das distintas actividades:


martes, 27 de abril de 2021

DÍA DO LIBRO 2021: APADRIÑAMENTO VIRTUAL

Todos os anos ao chegar estas datas facíamos unha das nosas actividades preferidas: O APADRIÑAMENTO LECTOR. O curso pasado xa foi diferente e foron as familias as que fixeron de padriños e madriñas para lerlle aos nenos e nenas nas súas casas.  
Este ano, tamén tivemos que realizalo de forma diferente ao non poder xuntarnos e ter que manter as aulas "burbulla": fixemos un apadriñamento virtual. 
Os alumnos e alumnas de 4º, 5º e 6º de primaria foron os padriños e madriñas que lles leron aos máis pequenos do cole diferentes contos que previamente gravaron nun vídeo e que logo foron proxectados nas diferentes aulas.
A experiencia resultou moi positiva, pero esperamos o vindeiro curso facelo ao xeito "antigo" para que a actividade resulte máis entrañable e os afillados e as afilladas  gocen sentindo a cercanía do seu padriño ou da súa madriña e viceversa.

Aquí tedes os contos que se gravaron e proxectaron. Dos deles fan referencia ao CAMIÑO DE SANTIAGO, dado que este é o tema do noso proxecto anual. 

- BO CAMIÑO, VALENTIÑO! 


- CANTO TE QUERO, PROFE!


- MAROSA E MARIÑA CAMIÑAN A COMPOSTELA 


- A VACA QUE PUXO UN OVO 

viernes, 9 de abril de 2021

MULLERES LIBRES POR UN MUNDO IGUALITARIO

Dende a escola buscamos sempre inculcar aos nosos alumn@s  o respecto, a tolerancia e o compromiso fronte ás diferenzas das persoas, independentemente da súa orixe, das súas crenzas e do seu sexo, e formalos na convinción de que todos somos iguais fronte á lei, todos temos os mesmos deberes e dereitos, e todos podemos ser recoñecidos e valorados en igual medida, independentemente do sexo co que nazamos, no desempeño dos nosos postos de traballo e polas nosas capacidades. 

Por iso queremos colaborar xa dende a etapa de infantil, dándolles a coñecer grandes mulleres que foron pioneiras en distintas facetas, ata non hai moito, case exclusivas  dos homes (grandes empresarias, políticas, gobernantas, científicas, deportistas, enxenieiras...) Co nosa pequena aportación dende a escola, queremos acabar cos estereotipos e as discriminacións, aínda tan presentes na actualidade.

Neste trimestre, os nenos e nenas de 6º de infantil realizaron un proxecto sobre unha pioneira: SONIA DELAUNAY

jueves, 8 de abril de 2021

SESIÓN DE CONTACONTOS: EL ÚLTIMO ÁRBOL

Despois da volta das vacacións, o 6 de abril, os pequenos e pequenas de infantil tiveron unha grata sorpresa no cole: unha sesión de contacontos cunha historia centrada no medio ambiente, na súa defensa e coidado, e na importancia que ten para todos nós.

EL ÚLTIMO ÁRBOL, de María Quintana Silva, foi a historia que escoitaron os nenos e nenas de 3, 4 e 5 anos en diferentes sesións (esta vez cada grupo dentro de cadansúa aula) e na que participaron activamente, interactuando coa contacontos que lles fixo partícipes da historia. 

"As árbores decidiron marcharse. Goran ve como o bosque se vai transformando nun deserto e preguntase tamén se a árbore do seu xardín xa se marcharía. Cando chega á casa, atópaa xusto a tempo para poder convencela de que se quede...".

Na seguinte presentación tedes unha selección de fotos dos momentos vividos durante as diferentes sesións:


Podedes escoitar o conto visualizando o seguinte vídeo: 


Os pequenos e pequenas remataron a sesión bailando e cantando ao ritmo da seguinte canción que nos fala de salvar o Planeta: